आवडीनुसार टूलबार निवडा 12 Nov 2007,

अक्षरश : शेकडो टूलबार आज उपलब्ध आहेत . अनेक सोयी त्यांच्यात आहेत . आपण आपली गरज ओळखून टूलबारची निवड करावी ...
.....
मागच्या वेळेस आपण टूलबारची माहिती घेतली . गूगल , याहू आणि एमएसएन यांचे तीन टूलबार सर्वसाधारणपणे डाऊनलोड केले जातात . त्यांची आपल्याला ब्राऊझर अधिक सुलभतेने वापरण्यासाठी मदत होते . हव्या त्या साइटचे बुकमार्क करून ठेवून ही सुलभता तुम्ही आणू शकता . तसेच लिंक्स टूलबारमध्ये हे बुकमार्क आणून हवी ती साइट पटकन ओपन करू शकता हे खरे ; पण बुकमार्कपेक्षाही जादा सुविधा अतिरिक्त टूलबारमध्ये मिळते .

' सायबरडिफेंडर सेफसर्च टूलबार १ ' या नावाचा एक टूलबार आहे . तुमच्या कम्प्युटरची सुरक्षा या टूलबारच्या हातात तुम्ही देऊ शकता . एखादी बनावट साइट ओपन झाल्यास अथवा तुमचा पासवर्ड कोणी ट्रॅक करत असल्यास वा कम्प्युटरमधल्या कोणत्याही मजकुरात कोणी गडबड करायचा प्रयत्न करत असला तर हा टूलबार तुम्हाला तात्काळ सूचना देतो . मात्र व्हायरस स्कॅन यात नसल्याने ती अपेक्षा ठेवू नका . पण साइट पाहताना पॉपअप होणाऱ्या जाहिराती रोखण्याचे काम तो चोखपणे बजावतो . एखाद्या विषयावर सर्च करायचा असेल तर त्याची सोय आहे आणि ओपन केलेल्या साइटची अधिक माहिती हवी असेल तर तीही मिळते .

' स्टम्बलअपॉन ' टूलबार हा अगदी वेगळा आहे . तुम्ही पाहात असलेल्या साइटच्या संदर्भातच दुसऱ्या साइट पाहायच्या असतील , तर या बटनवर क्लिक करा . अन्य इंटरनेटधारकांनी त्याच विषयात काय साइटस सुचविल्या आहेत तेही यावर पाहता येईल . थोडक्यात , हा परस्परसंवादी टूलबार आहे . जगातल्या चांगल्या साइट्स येथे विषयवार पाहायला मिळतील . तुम्ही तुमच्या आवडीनिवडीही नेटवर देऊ शकता . इतर लोक ते पाहून त्यावर मतप्रदर्शन करू शकतील . एकंदरित ही साइट म्हणजे साइटचा खजिनाच आहे .

खास सर्चसाठी असलेला टूलबार म्हणजे अल्टाव्हिस्टाचा टूलबार . इंटरनेट एक्स्प्लोररमध्ये अॅडऑन सुविधेत याचा समावेश करण्यात आला आहे . याचे वैशिष्ट्य म्हणजे २०पेक्षा अधिक सुविधांचा वापर करून आपण कोणत्याही विषयावर सर्च करू शकतो . भाषांतराची सोय असलेला हा बहुधा एकमेव टूलबार असावा . यात संपूर्ण वेबपेज दहा भाषांमध्ये भाषांतरित करण्याची सोय आहे . पॉपअप ब्लॉकर , एरिया झोन्स , एक्स्चेेंज रेट्स आदि सुविधाही यात आहेत . याची लेटेस्ट व्हर्जन सुमारे सव्वालाख लोकांनी डाऊनलोड केली आहे .

सर्चचाच विचार करायचा तर आस्क टूलबार ४ . ० . १ . १ हाही चांगला आहे . आस्क डॉट कॉम या जगप्रसिद्ध साइटचा हा टूलबार . कोणत्याही विषयावरचा सर्च इथे होऊ शकतो . इतर सुविधाही येथे उपलब्ध आहेत . ताज्या बातम्या , शेअरमाकेर्टमधले ताजे भाव , हवामान , डिक्शनरी , नकाशे आदी सोयीही आहेत . जेव्हा आणखी सुविधा अॅड होते तेव्हा ती आपोआप दिसायला लागते . म्हणजेच हा टूलबार आपोआप अपडेट होतो .

' ए - टूलबार ३ . ०१ ' हा टूलबार अगदी वेगळा आहे . यात सुमारे ४५ सुविधा उपलब्ध होतात . यात ताज्या बातम्यांपासून ते डेस्कटॉप सर्चपर्यंत सगळ्यांची सोय आहे . जगभराच्या वेळा सांगणारे घड्याळ आहे , पासवर्ड सेव्ह करण्याची सोय आहे , करन्सी कन्व्हर्टर आहे , भाषांतराची सोय आहे आणि डिक्शनरी पाहायची असेल तर तीही आहे . हा एकदा तरी डाऊनलोड करून पाहा . म्हणजे त्यातली विविधता लक्षात येईल .

तुम्हाला फक्त फोटोच शोधायचे असतील तर ? त्यासाठी ' पिक्चर्स टूलबार २ . ० . ०१ ' आहे . वेगवेगळे फोटो शोधून त्याची वर्गवारी तुम्ही करू शकता . फोटो सेव्ह करतानाच त्याची वेगळी लिंक तयार होते . समजा तुम्हाला सानिया मिर्झा आणि शाहरुख खानचे फोटो डाऊनलोड करायचे आहेत ; पण प्रत्येक खेळाडू वा अभिनेत्याची वेगवेगळी लिंक हवी असेल तर तशी करू शकता .

असेच अक्षरश : शेकडो टूलबार उपलब्ध आहेत . प्रत्येकाच्या स्वत : च्या खास सुविधा असतात . अन्यथा सर्वच टूलबारच्या सर्वच सुविधा काही आपल्या गरजेच्या नसतात . जो आपल्याला खरेच उपयोगी पडणारा आहे , तो डाऊनलोड करावा . समजा तुम्ही जास्त टूलबार डाऊनलोड केलेत तर ब्राऊझरच्या वरच्या भागात खूप गर्दी होते . मग काम करण्यात उलट अडथळेच येतात . यावर एक उपाय आहे . ब्राऊझरच्या वरच्या भागात ' व्ह्यू ' नावाची लिंक असते . त्यावर क्लिक करा . त्याखालीच टूलबार नावाची लिंक असेल . त्यावर माऊसचा कर्सर नेल्यावर उजव्या बाजूला ब्राऊझरमध्ये असलेले सर्व टूलबार दिसतील . जे तुम्हाला दिसायला नको असतील , त्यावर अनक्लिक करा ( म्हणजेच क्लिक असेल ते काढून टाका ) की तो टूलबार ब्राऊझरमध्ये दिसणार नाही . जेव्हा गरज असेल तेव्हा याच मार्गाने जाऊन त्यावर क्लिक करा .

तुम्ही इंटरनेटवर डाऊनलोड डॉट कॉमसारख्या साइटला टूलबार असा सर्च दिलात की हे सारे टूलबार तुमच्यासमोर हजर होतील . त्याची प्रत्येकी वैशिष्ष्ट्ये वाचून कोणता डाऊनलोड करायचा ते ठरवा .