गेल्या काही लेखांत आपण काही संज्ञांची माहिती करून घेत आहोत. आज मायक्रोसॉफ्ट वर्डशी संबंधित असलेले काही शब्द.
........
* वर्डआर्ट : कलात्मक अक्षर असा याचा शब्दश: अर्थ घेतला तरी चालेल. तुम्ही एखादे पत्र टाइप करत आहात वा ग्रीटिंग तयार करत आहात. त्यातील काही मजकूर ठळकपणे व वेगळा दिसावा असे तुम्हाला वाटत असेल तर या वर्डआर्टचा उपयोग करा. वर्डमध्ये 'व्ह्यू'वर क्लिक करून नंतर 'टूलबार'वर क्लिक करा. अगदी तळाशी वर्डआर्ट असे ऑप्शन दिसेल. त्यावर क्लिक करा. लगेचच एक छोटासा टूलबार वर्डच्या तळाशी दिसेल. तुम्हाला जो शब्द वेगळ्या स्वरूपात हवा आहे तो सिलेक्ट करा आणि या टूलबारमधील इंग्रजी 'ए' आद्याक्षरावर क्लिक करा. त्याबरोबर तुम्हाला तीस पर्याय दिसतील. 'वर्डआर्ट' हीच अक्षरे वेगवेगळ्या पद्धतीने केलेली दिसतील. त्यातील तुम्ही वर्डमधला सिलेक्ट केलेला शब्द 'वर्डआर्ट'मधल्या कोणत्या स्टाईलने हवा आहे ते पाहून त्यावर क्लिक करा. ते अक्षर वा शब्द लगेचच त्यात बदलेल व पूवीर्पेक्षा अधिक आकर्षक दिसेल. अर्थात हा प्रकार नियमित पत्रापेक्षा ग्रीटिंग बनवायला अधिक उपयोगी आहे. कोणा खास व्यक्तीला खास पत्र पाठवायचे असेल तर भाग वेगळा. पण या वर्डआर्टची मजाच वेगळी आहे.
* वर्डकाऊंट : हा भाग सर्वांच्याच सोयीचा आहे. तुम्ही मराठीत वा कोणत्याही भाषेत मजकूर टाइप करत असाल आणि आपण नेमके किती शब्द टाइप केले आहेत ते जाणून घ्यायचे असेल तर ही सुविधा तुमच्या सेवेला हजर आहे. पुन्हा वर्डमध्ये 'व्ह्यू'वर क्लिक करून नंतर 'टूलबार'वर क्लिक करा. शेवटून दुसरे ऑप्शन या वर्डकाऊंटचे दिसेल. त्यावर क्लिक केल्यावर तळाला 'रिकाऊंट' असा टूलबार दिसेल. तेथे 'क्लिक रिकाऊंट टु व्ह्यू' असे शब्द दिसतील. त्यावर क्लिक केल्यास मजकुराचे किती शब्द झाले आहेत, किती ओळी झाल्या आहेत, किती परिच्छेद आहेत याची पूर्ण माहिती दिसेल. काही प्रोग्राममध्ये मजकुराचे शब्द आपोआप दिसत राहतील अशी व्यवस्था केलेली असते. वर्डमध्ये मात्र प्रत्येक वेळेस क्लिक करावे लागते. तरीही ही अत्यंत उपयोगी सुविधा आहे.
* ऑटोटेक्स्ट : एखाद्या फाइलमध्ये काही शब्द पुन:पुन्हा वापरायचे असतील तर ते परत परत टाइप करण्याची गरज नाही. ते तुम्ही 'ऑटोटेक्स्ट'मध्ये सेव्ह करून ठेवू शकता. समजा 'कम्प्युटराइझ्ड' किंवा यापेक्षाही कठीण शब्द तुम्हाला मजकुरात पुन:पुन्हा वापरायचा असेल, तर हा शब्द एकदाच वापरून सिलेक्ट करा. मग वर्डमध्ये वरती 'इन्सर्ट-ऑटोटेक्स्ट-न्यू'वर क्लिक करा. तिथे इंग्रजीतून तोच शब्द टाइप करा. तो ओके करा. पुन्हा हा शब्द जेव्हा टाइप करायचा असेल तेव्हा टूलबारखाली 'ऑल एंट्रीज' नावाने नवा टूलबार असेल त्यावर क्लिक करून त्याखालील 'नॉर्मल'वर क्लिक करा. तिथे तुम्हाला इंग्रजीतून टाइप केलेला शब्द दिसेल. तो सिलेक्ट करा. तुम्ही मूलत: सेव्ह केलेला मराठी शब्दच तिथे उमटेल. असे कितीही शब्द तुम्ही ऑटोटेक्स्टमध्ये सेव्ह करू शकता. फक्त 'ऑल एंट्रीज', मग 'नॉर्मल' आणि तो सेव्ह केलेला शब्द यावर क्लिक केलेत की झाले काम. यापेक्षा मूळ शब्द टाइप केलेला लवकर होईल असा विचार तुमच्या मनात आलाय का? तो काढून टाका. टाइप करायला अवघड असे शब्द यात घातलेत तरच फायदा होईल. लहानसहान व सोपे शब्द घालायला गेलात तर ते मात्र वेळखाऊपणाचे होईल.
तुम्ही मजकूर इंग्रजीतून टाइप करत असाल तर हा 'ऑटोटेक्स्ट' प्रकार अधिक सोयीचा आहे. कारण वेगवेगळ्या संदर्भातले शब्द इथे बाय डिफॉल्टच सेव्ह केलेले आहेत. त्याचीही व्यवस्थित वर्गवारी केलेली आहे. हे एकदा करून पाहाच.
No comments:
Post a Comment