हे करून पाहा! 14 Nov 2007,

तुम्ही इंटरनेटसाठी कोणताही ब्राऊजर वापरत
असाल तरी तो ओपन केल्यावर जे पेज दिसते त्याला आपण होम पेज म्हणतो . हे होम पेज प्रत्येकाच्या आवडीनुसार सेट करता येते . समजा तुम्ही ' इंटरनेट एक्स्प्लोरर ७ ' वापरता आहात ( याच्या आधीचे व्हर्जन ६ काहीजण वापरतात ; कारण तो वापरायला अतिशय सुटसुटीत आहे . पण व्हर्जन ७ कम्प्युटरच्या सुरक्षेच्या दृष्टीने अधिक फायद्याचा आहे ) तर त्याच्या ' टूल्स ' वर क्लिक करा , अगदी तळाच्या ' इंटरनेट ऑप्शन्स ' वर क्लिक करा . एक बॉक्स ओपन होईल . त्याच्या पहिल्याच ' जनरल ' टॅबमध्ये सुरुवातीलाच ' होम पेज ' अशी सोय असेल . तुम्हाला जे होम पेज करायचे असेल , त्याचा यूआरएल ( म्हणजे पत्ता ) टाइप केल्यावर ते होमपेज होईल . तुम्ही नंतर जेव्हा जेव्हा ब्राऊजर ओपन कराल , तेव्हा तेव्हा हेच पान दिसेल . पण एका वेळेला अधिक होम पेजेस सेट करता येतात का ? त्याचे उत्तर होय असेच आहे . मात्र हे ' इंटरनेट एक्स्प्लोरर ७ ' मध्येच होऊ शकते .

तुम्ही समजा रिडिफ डॉट कॉम या साइटचे होम पेज केलेले असेल आणि तुम्हाला इंडियाटाइम्स डॉट कॉम हेही होम पेजच व्हावे असे वाटत असेल , तर इंडियाटाइम्सची साइट ओपन करा . तुमच्या टॅब बारच्या बाजूला होम , फीड्स , प्रिंट वगैरे बटन्स असतील . त्यातील ' होम ' च्या बाजूला खालच्या दिशेला जाणारा एक अॅरो असेल . त्याच्यावर क्लिक करा . त्यावर ' अॅड ऑर रिमूव्ह वेबपेज ' अशी लिंक असेल . त्यावर क्लिक केल्यावर तुम्हाला काही पर्याय दिसतील . ' अॅड धिस वेबपेज टू युवर होम पेज टॅब्ज ' हा त्यातला पर्याय निवडा . मग एकाचवेळी दोन होम पेजेस टॅबमध्ये ओपन होतील . त्यासाठी टॅबचे ऑप्शन मात्र ' ऑन ' पाहिजे . ते ऑन नसले , तर टॅब दिसणारच नाहीत . ते ऑन करण्यासाठी काय करावे लागेल ? पुन्हा टूल्स , इंटरनेट ऑप्शन्स , जनरल या मार्गाने जा . त्याच विंडोमध्ये ' टॅब्ज ' असे बटन असेल . त्याच्या बाजूच्या ' सेटिंग्ज ' वर क्लिक करा . सरुवातीलाच ' एनेबल टॅब्ड ब्राऊझिंग ' असे लिहिलेले असेल . त्यावर क्लिक करा . हे टॅब कशा पद्धतीने उघडायला हवेत त्या पर्यायांवरही क्लिक करा . मग ' इंटरनेट एक्स्प्लोरर ७ ' ब्राऊजर पुन्हा सुरू करा ; की तुम्हाला टॅब दिसायला लागतील . याचा मोठा फायदा असा की एकावेळी एक साइट पाहायची , मग ती बंद करायची , अॅड्रेस बारमध्ये जाऊन नवीन यूआरएल टाइप करायचा , ती साइट ओपन झाल्यावर पुन्हा याच पद्धतीने नवीन साइट ओपन करायची हा सारा त्रास वाचतो . एका वेळेला दोन ( वा अधिक ) होम पेज तयार करण्याची सोय फायरफॉक्समध्ये मला दिसली नाही .

' इंटरनेट एक्स्प्लोरर ७ ' मध्येच बऱ्याच सुविधांची भर आपल्याला घालता येते . काही खरोखरच गरजेच्या , तर काही केवळ गमतीच्या . त्यासाठी ' टूल्स ' वर क्लिक करा . मग मॅनेज अॅडऑन्स व नंतर फाईंड मोअर अॅडऑन्सवर क्लिक करा . विविध प्रकारच्या सुविधा तुम्हाला दिसतील . सिक्युरिटी , ब्राऊजर्स , एंटरटेनमेंट , टाइमसेव्हर्स वगैरे वर्गवारी असेल . तूर्त सिक्युरिटी टॅबवर क्लिक करा . तसे केल्यावर विंडोज लाइव्ह टूलबार . विंडोज डिफेंडर वगैरे प्रोग्राम्स दिसतील . त्याखालील तिसरा ' मॅकअॅफी साइट अॅडव्हायजर ' हा अत्यंत उपयोगी प्रोग्राम आहे . तुम्ही जी साइट पाहात आहात ती कितपत सुरक्षित आहे ते हा प्रोग्राम आपल्याला सांगतो . हा अॅडव्हायजर डाऊनलोड केलात की ब्राऊजरच्या वरती उजव्या बाजूला तो विराजमान होतो . त्याचा रंग हिरवा असला तर साइट पूर्णपणे सुरक्षित आहे असे समजा . लाल रंग असला तर साइट ताबडतोब बंद करा . पिवळा असला तर सावध राहा , असा याचा अर्थ .

हा अॅडव्हायझर एखाद्या बाबीवर सर्च करताना जास्त उपयोगी ठरतो . समजा तुम्ही एखाद्या विषयावर सर्च करता आहात तर तुमच्यासमोर अनेक पर्याय हा सर्च देतो . त्यातील नेमकी कोणती लिंक ओपन करावी हे तुम्हाला कळत नाही . अशावेळी हा अॅडव्हायझर मदतीला येतो . जर ती लिंक सुरक्षित असेल , तर त्या लिंकपुढे हिरव्या रंगात एक टिकमार्क असेल . त्यावर कर्सर नेल्यावर त्याचा तपशील दिसेल . ती लिंक कितीजणांनी पाहिली आहे , ती किती सुरक्षित आहे हे कळेल . तुमची खात्री झाली तर त्यावर क्लिक करा . लिंक योग्य नसेल तर त्यावर लाल रंग दिसेल . ती लिंक ओपन करू नका असा स्पष्ट इशारा असेल .

बाकीच्या अॅडऑन्सविषयी नंतर कधीतरी .