आपला कम्प्युटर अपडेट राहावा म्हणून प्रत्येकजण प्रयत्नशील असतो. पण नेमके कोणते प्रोग्राम्स अपडेट करावेत ते कळत नाही. म्हणून 'ऑटोमॅटिक अपडेट्स'चा पर्याय ओके केलेले अधिक चांगले....
आपला कम्प्युटर सुरक्षित असावा असे प्रत्येकाला वाटते. तसेच तो अद्ययावत असावा असेही वाटते. तो अद्ययावत असणे यातच तो सुरक्षित आहे असे अपेक्षित आहे. अद्ययावत असण्याचा फायदा असा की प्रत्येक सॉफ्टवेअर अपटूडेट आहे आणि त्याद्वारे मिळत असलेल्या सुविधा कम्प्युटर स्वीकारत आहे. पण कोणकोणते अपडेट्स आपण डाऊनलोड करावेत हे बऱ्याच वेळा आपल्या लक्षात येत नाही. आपल्याला प्रत्येक प्रोग्राम अपटूडेट असावासे वाटते. तसे वाटणे चूक नाही, पण आपल्या मशीनची रचना, त्यांच्या प्रोग्रामचा आवाका हे पाहून मगच अपडेट डाऊनलोड करावेत.
सध्या विंडोज व्हिस्ता बाजारात आला आहे. तो एक्सपीसारखा लोकप्रिय झाला नसला तरी त्याबद्दल लोकांमध्ये सुप्त आकर्षण आहेच. दुसऱ्याने नवे कपडे घातले की आपल्याला स्वत:चे कपडे जुनाट वाटायला लागतात, तसाच हा प्रकार आहे. म्हणूनच व्हिस्ताच्या वेगवेगळ्या थीम्स मोहून टाकतात. पण तुमच्या मशीनवर व्हिस्ता सिस्टिम बसवलेली नसेल तर या थीम्सचा काहीच उपयोग नाही. तुमचा एक्सपीचा कम्प्युटर व्हिस्तासारखा दिसावा म्हणून मायक्रोसॉफ्टने काही फ्री प्रोग्राम्स जरूर आणले आहेत. पण त्यात मजा नाही. म्हणून एक्सपी असेल तर त्यात सुख माना.
आता एक्सपी मशीन अपडेट ठेवायचे असेल आणि कोणते अपडेट घ्यावेत हे माहीत नसेल तर इंटरनेट एक्प्लोरर ओपन करून 'विंडोज अपडेट'वर क्लिक करा. (टूल्सवर क्लिक करून मग विंडोज अपडेट). मग कम्प्युटर अद्ययावत आहे की नाही याची तपासणी मायक्रोसॉफ्ट करते. मग तुमच्यापुढे दोन ऑप्शन्स ठेवले जातात. एक्सप्रेस आणि कस्टम. पहिल्या ऑप्शनमध्ये कम्प्युटरसाठी जेवढे आवश्यक असतात, तेवढेच अपडेट्स सुचविले जातात. दुसऱ्या ऑप्शनमध्ये आवश्यक, अनावश्यक असे सगळेच अपडेट्स दिलेले असतात. साहजिकच या दोनपैकी एक्स्प्रेसवर क्लिक करा. मग मशीनचे स्कॅनिंग होईल व आवश्यक असेच अपडेट्स डाऊनलोड करायचे सुचविले जाईल. तेवढेच अपडेट्स अगदी डोळे झाकून डाऊनलोड करा. की विंडोजमधील महत्त्वाचे सगळे प्रोग्राम्स आपोआप अपडेट होतील.
हे अपडेट आपोआप होत राहिले तर? तीही सोय विंडोजमध्ये आहे. त्यासाठी डेस्कटॉपवरील 'माय कम्प्युटर' आयकॉनवर राइट क्लिक करा. मग शेवटी प्रॉपटीर्जवर जा. त्यावर क्लिक केल्यावर 'सिस्टिम प्रॉपटीर्ज' अशा नावाचा बॉक्स दिसेल. त्यात 'ऑटोमॅटिक अपडेट्स' असा उल्लेख असणारा टॅब दिसेल. त्यावर क्लिक करा. मग जी विंडो येईल, त्यात 'ऑटोमॅटिक अपडेट्स- रिकमेंडेड' असा उल्लेख असेल तो सिलेक्ट करा आणि विंडो क्लोज करा. विंडोज सिस्टिमचे जे जे अपडेट्स असतील ते आपोआप मिळत जातील.
एक लक्षात घ्या की फक्त विंडोज प्रोग्राम वा फाइल अपडेट होईल. तुमचा अँटिव्हायरस वा अन्य फाइल्स अपडेट होणार नाहीत. अँटिव्हायरसच्या सेटिंग्जमध्ये जाऊन 'ऑटोमॅटिकली डाऊनलोड अपडेट्स' यावर होकाराथीर् क्लिक करावे लागेल. मगच तुमचे इंटरनेट चालू असल्यावर तो आपोआप अपडेट होत राहील. शक्यतो रोजच्या वापरातले प्रोग्राम्स आपोआप अपडेट होत राहतील असेच पाहा. त्यासाठी प्रत्येकाच्या सेटिंगमध्ये 'ऑटोमॅटिक अपडेट्स'चा टॅब सिलेक्ट करणे आवश्यक आहे. जर तुम्हाला एखाद्या प्रोग्रामबद्दल माहिती नसेल आणि त्याचा अपडेट खरोखरच आवश्यक आहे का हे माहीत नसेल, तर मात्र तुमच्या इंजिनीअरची मदत घ्या.
सध्या विंडोज एक्स्पीमध्ये सव्हिर्स पॅक दोन उपलब्ध आहे. याचाच अर्थ मूळ विंडोज एक्सपीमध्ये आतापर्यंत दोनदा मोठ्या सुधारणा करण्यात आल्या आहेत. आता तिसरा पॅक लवकरच येत आहे. त्याविषयी पुढील आठवड्यात.
आता एक दुरुस्ती. मी मागच्या लेखात मराठी फाँटबद्दल लिहिताना त्या मजकुराची पीडीएफ करताना फाँट हरवतो व भलताच मजकूर तयार होतो, असे म्हटले होते. डॉ. प्रसाद वायंगणकर (मालवण) आणि उदय सावंत या 'म. टा.'च्या दोन वाचकांनी माझी चूक दुरुस्त केेली आहे. मजकुराचा प्रिंट स्क्रीन घ्यायचा व ते मशीनमधल्या पेंटमध्ये पेस्ट करायचे की त्याची आपल्याला चित्ररूपातील फाइल करता येते. ती दुसऱ्या माणसाला पाठविली तर तो विशिष्ट फाँट मशीनमध्ये नसूनही पलीकडच्याला तो मराठीतला मजकूर व्यवस्थित वाचता येतो. या दोघांच्याही मते पीडीएफ फाइल करतानाही काही विशिष्ट सेटिंग्ज केली तर मराठी फाँट व्यवस्थित राहतो.
No comments:
Post a Comment